Direkt zu:

Informieren Leer ist sehenswert!

Oostfreeske Kookbook

Wat paast beter in `n Wintermaand as lecker Grönkohl. Van Wiehnachten sünd wi noch satt van de hele sööt Zuckergood, van „Gesottenes und Gebratenes“, dat `n deftige Kohlpott uns Liev weer uprümt. Völ Pleseer bi `t Koken un Vertehren van disse Leckeree!

Grönkohl

Grönkohl waschen un snieden

In `n groot Pott geven un ofwelln

Water dor overgeten

Smalt in `n Pott utlaten, dorup de Grönkoh, dörwussen Speck, dröge Mettwursten of Kasseler geven.

De Grönkohl mit `n bietje Water, Solt un `n paar Ziepels (de laten di de Kohl later beter bekomen) garkoken.

Lüttje Gört in en enkelde Pott mit Smalt of Ungel (heel na Geföhl) solang koken, bit dat all mitnanner to Bree word.

De Gört mit in `t Grönkohl geten un mit Solt, Peper un Mustert ofsmecken.

Sull de Kohl wat bitter wesen, dann helpt `n Lepelke Zucker


Wenn Snee un Iis dat vör d’ Dör all witt inklört hebben, un dat so ieserg kolt, dat dat an Moisten in d’ Hörn an `t Für is, dann helpt een so en lecker Puffert mit Peern weer up de Been. Nu sall dat in Oostfreesland Lü geven, de neet weten, up welker Aar dun Maneer disse Leckeree maakt word. – Un jüst disse arm Bloden willen wi geern unner d’ Arms griepen un mit disse Rezept `n bietje rieker maken.

Puffert un Peern

  • 1 Pund Mehl
  • 30 Gramm Hefe
  • 1 Teelepel Zucker
  • ¼ Liter Melk
  • 1 Mestspitze Solt

Mehl in en Kumme sieben. En Gatt in de Mehl maken un dorin de Hefe mit en Teelepel Zucker un `n bietje warm Melk anröhren. De Gatt naderhand weer mit Mehl todecken. Mit en Handdook de Kumm ofdecken un up `n warm Stee gahnlaten.

De Deeg is upgahn, wenn de Mehl upplatzt is. Nu kann de Deeg mit de Rest van de warm Melk dörkneedt worden.

De Deeg warmstellen bit dat he up ´t Dübbelte hooggahn is. Noch eenmaal dörkneden.

De Puffertförm infetten un viellicht mit Speckschieven utleggen. Dorup de Deeg geven un dor boven up ok `n Paar Schieven sollten Speck leggen (sünner Decksel in d’ Backovend backen – man kann ok, wenn man kein Puffertförm hett, eenfach en Kranzförm nehmen).

De Puffertförm mit de Decksel tomaken, in ´n Pott vull Water up d’ Ovend stellen un koken laten. Back/ Kooktied 40 Min. (na Geföhl).

Peern

1 Pund Peern mit Zucker, en Stang Kaneel un ¼ Liter Water koken (de Saft na Gesmack mit Puddingpulver andicken of puur geneten).

De klaar Puffert in dicke Schieven snieden un tosamen mit de Peern geneten.

Smakelk Eten!


Ut Tuffels maken de Oostfresen de leckerste Saken. Stamptuffels mit Suurkohl, Insett Bohnen, Stekerröven, updrögt Bohnen, Buuskohl – all disse besünners „kulinarische“ Mahltieden ut Moders Köken wassen sünner Tuffels neet to maken. Elker Fründ van uns oostfreeske Eten fangt an to slickbeckjen, wenn `t „Tuffel-Riev-Pannkook“, ok wall „Tuffelpannkook“ nömt, up d’ Etensplaan steiht. Un so word`t maakt:

Tuffel-Riev-Pannkook

  • 1 kg Tuffels
  • `n bietje Solt, Peper un Muskaat
  • 1 Ziepel
  • 2 Eier
  • 2 Eetlepels suur Rohm
  • Speckdobels, Smalt of Ölje

Tuffels rieven un utdrücken of dörsieben. Heel na Gesmack sollten un pepern (viellicht ok Muskaat dortogeven). En Ziepel in fien Dobels snieden un mit Eier, suur Rohm un `n bietje Mehl of en reven Tweeback mit de Tuffelmengsel dörnanner röhren.

Speckdobels of Ölje in `n Paan utlaten of heetmaken un dorin de Mengsel lepelwies ringeven. Van beid Sieden bruun un kross braden.

To Tuffel-Riev-Pankook smeckt besünners good sülvstmaakt Appelmuus.